NOTA DE PRENSA COMITE DE EMPRESA F.P HOSPITAL SALNES

O Comité de Empresa do Hospital do Salnés quere manifestar publicamente que denunciou en reiteradas ocasións a ausencia de determinadas categorías profesionais (celadores, auxiliares administrativos) asi como a falta de reforzo das áreas asistenciais (hospitalización, quirófanos, urxencias, servizos centrais e consultas ambulatorias) co persoal necesario para dotar estes servizos do numero suficiente de efectivos para evitar a sobrecarga sistemática de traballo á que se ve sometida a totalidade do persoal. Dita situación repercute e afecta tanto aos traballadores como aos usuarios do Hospital.


O Comité de Empresa solicitou ante o SERGAS, e ante a Dirección e Padroado da Fundación, a dotación orzamentaria necesaria e a contratación que permita corrixir o desaxuste actual.


No último ano realizáronse movementos de reforzo do persoal que resultan insuficientes polo momento.


O persoal esperou, pacientemente, que no ano 2008 se producíse a incorporación de persoal esixida. Esta esperanza foi defraudada pola recentemente comunicación e negativa do SERGAS a realizar, no Hospital do Salnés no 2008, incremento algún de persoal para calquera das categorías profesionais existentes nin para as que aínda non se crearon.

A negativa do SERGAS ao incremento de persoal é a última agresión aos traballadores do Hospital e unha volta de torca máis en contra das lexítimas reivindicacións e naturais expectativas do persoal.


Coa integración no SERGAS o persoal do Hospital pide ver melloradas as súas condicións laborais e que se lle sitúe de feito nun plano de igualdade co resto dos traballadores do sistema público de saúde.


O Comité de Empresa detecta e informa que os traballadores non se atopan en situación de soportar a excesiva carga de traballo e as consecuencias que sofren, afectando incluso o seu estado de saúde, o que finalmente repercutirá tamén sobre o nivel de calidade ofertado ata agora e que actualmente é demandado pola poboación.


Por iso esiximos a dotación inmediata dun plan de incorporación e incremento do persoal estrutural deseñado para dar solución ás demandas expostas e cun prazo máximo de execución progresivo pero necesariamente finalizado no ano 2008.


Esta demanda non é nova e o Comité de Empresa leva máis dun ano anunciándoo polo que a insuficiente resposta da Dirección e da Consellería de Sanidade non se pode soster salvo que se queira confiar, por parte da Administración e os seus xestores, en que se aceptarán por parte dos traballadores, improvisacións e ocorrencias finais, con solucións parciais ou que traten de perpetuar as deficitarias condicións actuais, ignorando deliberada e torpemente que entramos nun escenario estatutario que ten que conducir a unha mellora substancial para a atención aos usuarios e a vida dos traballadores.

Facer caso omiso da situación leva a imaxinarnos unha perpetuación e agravamento das indesexables deficiencias que cada vez máis son detectadas e denunciadas polos usuarios, como atrasos no acceso á habitación definitiva tras o seu ingreso, atrasos ou imposibilidade para o aseo do persoal, demora na xestión de probas -ata en situacións de urxencia- e, en definitiva, dificultades para a asistencia clínica e sanitaria diaria.


O persoal do Hospital non acepta de ningún xeito que poida tratarse de responsabilizarlle da dexeneración do servizo e alerta do fin da súa capacidade de resolución.


Neste senso e para constatación da realidade cotiá, o Comité de Empresa promoverá entre outras medidas a recollida de sinaturas entre os profesionais, usuarios e pacientes afectados, para que poidan adherirse á demanda dun incremento de persoal e a adaptación do Hospital aos estándares do Sergas e para que, de forma gráfica, poidan manifestarse en favor da defensa dun sistema sanitario público de calidade para os cidadáns da Area Sanitaria do Salnés ó igual que outras da nosa autonomía, coa dotación estrutural de persoal necesario para poder acompañar e coidar aos enfermos, atendendo e protexendo a saúde da poboación cos niveis de calidade esixidos por uns e outros.